Raja Satrusenanka nirdesare Senapati Samarasen bahari thile anya desa jayi dhana lutiba pain. Kintu samudra jhada pare se pahanchile eka ajana, bhayankara dwipare. Kana heba tanka bhagya? Parhantu ehi romanchaka katha.
Kundalama Dwipera Rahasya – କୁଣ୍ଡଳମ
କୁଣ୍ଡଳମ ଦ୍ବୀପର ରାଜା ଶତ୍ରୁସେନ ପ୍ରଜାମାନଙ୍କ ଗହଣରେ ଜନପ୍ରିୟ ହେବା ଆଶାରେ ସେମାନଙ୍କ କରଭାର ଅଧା କରିଦେଲେ। କିନ୍ତୁ ଏହାର ପରିଣାମ ସ୍ବରୂପ ଖୁବ୍ ଶୀଘ୍ର ରାଜକୋଷ ଶୂନ୍ୟ ହୋଇଗଲା। ରାଜ୍ୟର ଏହି ଆର୍ଥିକ ସଙ୍କଟ ଦୂର କରିବା ପାଇଁ ସେନାପତି ସମରସେନ ରାଜାଙ୍କୁ ଅନ୍ୟ ଦେଶ ଉପରେ ଆକ୍ରମଣ କରି ଧନସମ୍ପତ୍ତି ଲୁଟି ଆଣିବାକୁ ପରାମର୍ଶ ଦେଲେ।
ସେନାପତିଙ୍କ କଥା ଅନୁସାରେ ନୌବାହିନୀ ପ୍ରସ୍ତୁତ ହେଲା ଏବଂ ଯେଉଁ ମୁହୂର୍ତ୍ତରେ ଜାହାଜଗୁଡ଼ିକ ଯାତ୍ରା ଆରମ୍ଭ କଲେ, ଠିକ୍ ସେତିକି ବେଳେ ଦକ୍ଷିଣ ଆକାଶରେ ଏକ ରହସ୍ୟମୟ ଧୂମକେତୁ ଦେଖାଦେଲା। ପ୍ରଥମେ ସମୁଦ୍ର ଶାନ୍ତ ଥିଲା ଏବଂ ପବନ ଅନୁକୂଳ ଥିବାରୁ ସୈନ୍ୟମାନେ ଉତ୍ସାହର ସହ ଆଗକୁ ବଢ଼ୁଥିଲେ। କିନ୍ତୁ କିଛି ସମୟ ପରେ ଆକାଶରେ ଏକ କଳାମେଘ ଘୋଟିଯାଇ ସେହି ଧୂମକେତୁକୁ ଢାଙ୍କିଦେଲା। ଧୀରେ ଧୀରେ ସମୁଦ୍ରରେ ଭୟଙ୍କର ଝଡ଼ତୋଫାନ ଆରମ୍ଭ ହୋଇଗଲା ଏବଂ ପ୍ରଚଣ୍ଡ ତରଙ୍ଗମାଳା ସୃଷ୍ଟି ହେଲା। ନୌକାଗୁଡ଼ିକ ପରସ୍ପର ସହ ଧକ୍କା ହେବାକୁ ଲାଗିଲେ ଏବଂ ଚାରିଆଡ଼େ ଅନ୍ଧକାର ଖେଳିଗଲା।
ସୈନ୍ୟମାନେ ଭୟଭୀତ ହୋଇ ଦ୍ବୀପକୁ ଫେରିଯିବାକୁ ଚାହୁଁଥିଲେ ମଧ୍ୟ ସେନାପତି ସମରସେନ ସେମାନଙ୍କୁ ସାହସ ଦେଇ କୁଣ୍ଡଳମା ଦେବୀଙ୍କ ନିକଟରେ ପ୍ରାର୍ଥନା କଲେ। ସକାଳ ହେବା ବେଳକୁ ଝଡ଼ବର୍ଷା ଥମିଯାଇଥିଲା, କିନ୍ତୁ ସେନାପତି ଦେଖିଲେ ଯେ ସେମାନଙ୍କର ପ୍ରାୟ ଅଧାଅଧି ନୌକା ସମୁଦ୍ରରେ ବୁଡ଼ିଯାଇଛି ଏବଂ ଅନେକ ସୈନ୍ୟ ସଲିଳ ସମାଧି ନେଇଛନ୍ତି। ବଞ୍ଚିଥିବା କ୍ଲାନ୍ତ ଓ ଭୟଭୀତ ସୈନ୍ୟମାନଙ୍କ ମନୋବଳ ଫେରାଇବା ପାଇଁ ସେ ସମସ୍ତଙ୍କୁ ଏକତ୍ରିତ କଲେ। ସେମାନେ କେଉଁ ଦିଗରେ ଅଛନ୍ତି ଜାଣିବା ପାଇଁ ଜଣେ ସୈନିକ ଜାହାଜର ମାସ୍କୁଲ ଉପରକୁ ଚଢ଼ି ଦୂରକୁ ଅନାଇଲା ଏବଂ ପୂର୍ବ ଦିଗରେ କିଛି ପକ୍ଷୀ ଉଡ଼ୁଥିବାର ଦେଖି ସ୍ଥଳଭାଗର ସୂଚନା ଦେଲା।
ସେନାପତିଙ୍କ ନିର୍ଦ୍ଦେଶରେ ନାବିକମାନେ ସେହି ଦିଗକୁ ଜାହାଜ ଚଳାଇଲେ ଏବଂ ସୂର୍ଯ୍ୟାସ୍ତ ସମୟରେ ଏକ ଅଜଣା ଦ୍ବୀପର ଉପକୂଳରେ ପହଞ୍ଚିଲେ। ଦ୍ବୀପଟି ଘଞ୍ଚ ଜଙ୍ଗଲରେ ପୂର୍ଣ୍ଣ ଥିଲା ଏବଂ ସେଠାରେ କିଛି ଭୟଙ୍କର ଜୀବଜନ୍ତୁ ବୁଲୁଥିବାର ଆଭାସ ମିଳୁଥିଲା। ବିପଦର ଆଶଙ୍କା କରି ସେନାପତି ସମସ୍ତ ସୈନ୍ୟଙ୍କୁ ଏକାସଙ୍ଗେ କୂଳକୁ ଓହ୍ଲାଇବାକୁ ମନା କଲେ। ସେ ନିଜେ କିଛି ସାହସୀ ଓ ଅଭିଜ୍ଞ ସୈନିକଙ୍କୁ ସାଥୀରେ ଧରି, ହାତରେ ଖଣ୍ଡା ଧରି ସନ୍ତର୍ପଣରେ ଦ୍ବୀପ ଭିତରକୁ ଅନୁସନ୍ଧାନ ପାଇଁ ଗଲେ। ଜଙ୍ଗଲ ଭିତରେ କିଛି ବାଟ ଯିବା ପରେ ସେମାନଙ୍କ କାନରେ ଏକ ବିକଟାଳ ଓ ଭୟାବହ ଗର୍ଜନ ପଡ଼ିଲା। ସେନାପତି ସୈନ୍ୟମାନଙ୍କୁ ସାହସ ଦେଇ ଆଗକୁ ବଢ଼ିଲେ ଏବଂ ଏକ ବଡ଼ ହ୍ରଦ କୂଳରେ ପହଞ୍ଚି ସେଠାକାର ଦୃଶ୍ୟ ଦେଖି ସ୍ତମ୍ଭୀଭୂତ ହୋଇଗଲେ।
ସେଠାରେ ବହୁ ଲକ୍ଷ ବର୍ଷ ପୂର୍ବର ପ୍ରାଗୈତିହାସିକ ପ୍ରକାଣ୍ଡ ଜୀବମାନେ ପରସ୍ପର ମଧ୍ୟରେ ଲଢ଼ୁଥିଲେ। ଏପରିକି ଗଛ ଉପରେ କିଛି ଆଦିମ ନରବାନର ହାତରେ ପଥରର ଅସ୍ତ୍ର ଧରି ସେହି ଦୃଶ୍ୟ ଦେଖୁଥିଲେ। ଏତିକି ବେଳେ ହ୍ରଦ କୂଳରୁ ଏକ ବିଶାଳକାୟ ହାତୀ ଭୟଭୀତ ହୋଇ ସେନାପତି ଓ ତାଙ୍କ ସୈନ୍ୟମାନଙ୍କ ଆଡ଼କୁ ସେହି ଘଞ୍ଚ ଜଙ୍ଗଲ ଭିତରେ ମାଡ଼ି ଆସିଲା।
ସେନାପତି ତୁରନ୍ତ ସମସ୍ତଙ୍କୁ ଗଛ ଉପରକୁ ଚଢ଼ିଯିବାକୁ ନିର୍ଦ୍ଦେଶ ଦେଲେ। ସେମାନେ ଗଛ ଉପରକୁ ଚଢ଼ିବା ମାତ୍ରେ ଦେଖିଲେ ଯେ ଦୁଇଟି ଭୟଙ୍କର ସିଂହ ସେହି ବିଶାଳକାୟ ହାତୀ ଉପରକୁ କୁଦିପଡ଼ି ଆକ୍ରମଣ କରୁଛନ୍ତି। ଏଭଳି ଏକ ଅଦ୍ଭୁତ ଓ ବିପଜ୍ଜନକ ଦ୍ବୀପରେ ସେନାପତି ସମରସେନ ଓ ତାଙ୍କ ସୈନ୍ୟମାନେ ନିଜକୁ କିପରି ରକ୍ଷା କରିବେ? ସେମାନଙ୍କର ଏହି ଅଭିଯାନ ସଫଳ ହେବ ନା ସେମାନେ ଏହି ଅଜଣା ଦ୍ବୀପରେ ଫସି ରହିବେ?
