ପଢ଼ନ୍ତୁ ପ୍ରସିଦ୍ଧ ଓଡ଼ିଆ ଶିଶୁ କବିତା ‘ବଣ ଓ ବଣି’ (ଦେଖିଲା କୁନା ମହୁଲ ଡାଳେ ବସିଛି ଏକ ବଣି)। Read full lyrics details of the popular Odia poem Bana O Bani for children.
Bana O Bani Poem Lyrics in Odia | ବଣ ଓ ବଣି କବିତା
ଦେଖିଲା କୁନା ମହୁଲ ଡାଳେ
ବସିଛି ଏକ ବଣି
ପଡୁଛି ଯେତେ ମହୁଲ ଫୁଲ
ହିସାବ କରେ ଗଣି ॥ ୧ ॥
ଡାକିଲା କୁନା କିଆଁଲୋ ବଣି
ଘଷୁଛୁ-ଥଣ୍ଟ ଡାଳେ ?
ଆ’ ମୋ ପାଶେ ଖାଇବୁ ଯେବେ
ମିଠା ପିଜୁଳି ଫଳେ ॥ ୨ ॥
ସୁନାର ଏକ ପଞ୍ଜୁରି ଗଢ଼ି
ଆଣିବେ ବାପା ମୋର
ମାଆଠୁ ମାଗି ଦେବିଲୋ ତୋତେ
କଦଳୀ, ଛେନା, ସର ॥ ୩ ॥
ସୁନା ଗିନାରେ ଦେବି ମୁଁ ପାଣି
ରୂପା ଥାଳିରେ ଭାତ
ବୁଲାଇ ନେବି ମେଳାକୁ ତୋତେ
ଦେଖିବୁ କେତେ ଯାତ ॥ ୪ ॥
କହିଲା ବଣି କୁନା ଭାଇନା
କହିଲ ସତ ଏକା
ମନେ ତୁମର ଶରଧା ଥାଉ
ନିଇତି ହେବ ଦେଖା ॥ ୫ ॥
ଗଛରୁ ଗଛ ଉଡ଼ି ଉଡ଼ିକା
ପାଉଛି କେତେ ସୁଖ
ଡାଳରେ ଥାଇ ଦେଖଇ ମୁହିଁ
ଜହ୍ନମାମୁଁର ମୁଖ ॥ ୬ ॥
ବୁଲୁଛି ଖାଇ ବଣର ଫଳ
ଡିମିରି, ଆମ୍ବ, ଜାମୁ
ଶୋଉଛି ସୁଖେ ବସାରେ ମୋର
ଲେଉଟି ନାନା କାମୁ ॥ ୭ ॥
କୁନା ଭାଇନା ସୁନା ପଞ୍ଜୁରି
ସେ ସୁଖ ଦେବ କିବା ?
ଯିଏ ଯାହାର ମନ ଖୁସିରେ
ଆପଣା ସୁଖେ ଥିବା ॥ ୮ ॥
ଲୋଡ଼ା ନାହିଁ ମୋ ସୁନା ପଞ୍ଜୁରି
ରୂପା ଥାଳିର ଭାତ
ଏ ଗଛ ଡାଳ ସରଗ ମୋର
ବଣ ପରାଣ ମିତ ॥ ୯ ॥
